Bu gün təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinin ikinci günüdür.
İmtahandan maksimum nəticə əldə edən müəllimlərdən biri də Sumqayıt şəhər 4 nömrəli tam orta ümumtəhsil məktəbinin təsviri incəsənət müəllimi Leyla Nuriyevadır.
O, sertifikatlaşdırma prosesində ən yüksək nəticəni göstərərək 60 bal toplayıb.
AzEdu.az bu münasibətlə Leyla müəllimlə həmsöhbət olub.
O, gecə-gündüz oyaq qalaraq imtahana hazırlaşdığını qeyd edib:
"İmtahanın nəticələrini öyrəndiyim an yaşadığım hissləri sözlə ifadə etmək çox çətindir. İlk reaksiyam sadəcə inanmaq olmadı. Hətta nəzarətçidən xahiş etdim ki, o da nəticəyə baxsın. O da təsdiqləyəndən sonra orada həqiqətən 60 bal topladığıma tam əmin oldum. İnsanın çəkdiyi əziyyətin bəhrəsini görməsi, bildiklərinin bu cür yüksək nəticə ilə təsdiqlənməsi çox qürurvericidir.
6 ildir ki, Sumqayıt şəhəri 4 nömrəli tam orta məktəbdə təsviri incəsənət fənnini tədris edirəm. Bu məktəbə 2020-ci ildə Müəllimlərin İşə Qəbulu (MİQ) imtahanı vasitəsilə qəbul olmuşam. Həmin imtahanda da heç bir kənar kömək olmadan, özüm hazırlaşaraq 50 bal (36 ixtisas, 14 kurikulum) toplamışdım. Elə bu sertifikasiya imtahanına da öz fənnim üzrə tamamilə fərdi şəkildə hazırlaşmışdım, sadəcə metodika (kurikulum) hissəsində digər bir repetitordan dəstək almışdım".
Digər həmkarlarıma və imtahana hazırlaşan müəllimlərə tövsiyə edirəm ki, həyəcanı kənara qoyub bütün diqqətlərini suallara cəmləsinlər:
İmtahandakı sualların səviyyəsinə gəlincə, deyə bilərəm ki, qənaətbəxş idi. Nə həddindən artıq çətin, nə də çox asan idi, tam orta səviyyədə tərtib olunmuşdu. Düzdür, bəzi suallarda tərəddüdlərim var idi və səhv yaza biləcəyimi düşünüb ən azı 55-56 bal gözləyirdim. Lakin monitorda 60 balı görəndə həm çox sevindim, həm də özümə olan inamım bir daha artdı.
Bu uğurun sirrini ilk növbədə Allahın nəsib etdiyi güc və qüvvətdə görürəm. Sertifikatlaşdırma imtahanına yanvar ayından etibarən ciddi şəkildə hazırlaşmağa başlamışdım.
Sertifikatlaşdırma imtahanlarının keçirilməsinin çox böyük müsbət tərəfləri var. Bu proses bizə biliklərimizi yenidən təkrarlamaq imkanı verir, həmçinin maddi cəhətdən də böyük xeyri var. Ən əsası, bu imtahanlar bizə daha böyük motivasiya verir, sanki bizi uğur qazanmağa və qarşımıza qoyduğumuz məqsədlərə çatmağa doğru irəli aparır.
Digər həmkarlarıma və imtahana hazırlaşan müəllimlərə tövsiyə edirəm ki, hər zaman diqqətli, səbirli və təmkinli olsunlar. İmtahan zamanı həyəcanı kənara qoyub bütün diqqətlərini suallara cəmləsinlər".
