Sumqayıtda kişi qısqanclıq zəminində qonşularını yandırıb. Sumqayıt24 bu haqda 10 sentyabr tarixində Apa.az-a istinadən xəbər verir.
Hadisə şəhərin Xəzri yaşayış massivində səhər saatlarında qeydə alınıb. 41 yaşlı Anar Məmmədov qonşusunun evinə pəncərədən benzin tökərək yaşayış sahəsinə od vurub. Bu zaman özü və hadisə zamanı evdə olan 58 yaşlı Oruc Qocayev, onun gəlini 28 yaşlı Günay Qocayeva və nəvəsi Həsən Qocayev müxtəlif dərəcəli yanıq xəsarətləri alıblar. Zərərçəkənlər Sumqayıt Təcili Tibbi Yardım Xəstəxanasına yerləşdiriliblər.
Anar Məmmədovun bədəninin bütün hissələri yandığından vəziyyəti ağırlaşıb. O, təcili tibbi yardım avtomobili ilə Bakı Yanıq Mərkəzinə göndərilib.
Anar Məmmədov həyat yoldaşından 2016-cı ildə boşanıb. Məmmədovun hadisəni qısqanclıq zəminində törətdiyi bildirilir. Keçmiş həyat yoldaşının sözlərinə görə, Anar onu qonşusuna qısqanırmış. Aynurə Məmmədova boşanmalarına baxmayaraq, eyni evdə qaldıqlarını, lakin hadisə baş verən zaman anasıgildə olduğunu deyib.
Faktla bağlı araşdırma aparılır.
