Sumqayıtda məhəllələrin birində yerləşən yataqxananın vəziyyəti olduqca acınacaqlıdır.
Bu barədə Sumqayit24.az-a 41-ci məhəllə 9 nömrəli yataqxananın sakinləri məlumat veriblər.
Onların sözlərinə görə, divarların müxtəlif hissələri qopub, digər hissələrində isə uçma təhlükəsi var. Bundan əlavə, tavandan çirkab sular axır. Sakinlər bildirirlər ki, mövcud vəziyyət onların gündəlik həyatında ciddi çətinliklər yaradır.
Vətəndaşların sözlərinə əsasən, müxtəlif vaxtlarda aidiyyəti qurumların nümayəndələri əraziyə gələrək burada yaşayan ailələrin siyahısını tərtib ediblər və binanın plana salınaraq söküləcəyini bildiriblər. Lakin onların iddiasına əsasən, indiyədək məsələ ilə bağlı hər hansı ciddi tədbir görülməyib.
Şikayətçilər aidiyyəti qurumlardan əraziyə baxış keçirilməsini, məsələnin araşdırılmasını və problemin həllini xahiş edirlər.
