Sumqayıt şəhərində isti hava şəraiti ilə əlaqədar maarifləndirmə aksiyası təşkil olunub.
Bu barədə Sumqayit24.az-a Qızıl Aypara Cəmiyyətinin (AzQAC) Sumqayıt bölməsindən məlumat verilib.
Bildirilib ki, AzQAC-ın təşəbbüsü ilə şəhərin mərkəzi məkanlarından və əhalinin sıxlıq təşkil etdiyi "Nizami meydanı"nda keçirilən aksiya çərçivəsində sakinlərə yüksək temperaturun sağlamlığa təsiri, günvurma və susuzlaşma riskləri barədə məlumat verilib.
Tədbir zamanı vətəndaşlara birbaşa günəş şüaları altında uzun müddət qalmamaq, kölgəlik ərazilərə üstünlük vermək və gün ərzində kifayət qədər su qəbul etmək tövsiyə olunub. Xüsusilə uşaqlar, yaşlılar və açıq havada çalışan şəxslərin isti havalarda daha diqqətli olmalarının vacibliyi vurğulanıb.
Aksiya çərçivəsində sakinlərə 800 ədəd içməli su və isti hava şəraitində davranış qaydalarını əks etdirən 800 maarifləndirici buklet paylanılıb.
Tədbirdə Azərbaycan Qızıl Aypara Cəmiyyətinin Baş Qərargahı, Sumqayıt Regional Mərkəzi və Sumqayıt Şəhər Bölməsinin əməkdaşları və könüllüləri (ümumi 50 nəfər) iştirak ediblər.
