Yerli mətbuatda yayılan məlumatda Sumqayıtda fəaliyyət göstərən "Pine Park" restoranında sayğacdan kənar su xəttinə qoşulma aşkar edildiyi və icarədarın cərimələndiyi bildirilmişdi.
Lakin restoranın icarədarı Mirəyyub Təyubzadə Sumqayit24.az-a açıqlamasında bu xəbəri təkzib edib.
Məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti ilə əlaqə saxladıq. Qurumun açıqlamasına görə, qanunsuz qoşulma faktı "Pine Park" restoranında deyil, Sumqayıt şəhəri, Səməd Vurğun küçəsi 116 ünvanında yerləşən və "Novator Group" MMC-yə məxsus qeyri-yaşayış sahəsində fəaliyyət göstərən "Park" restoranında aşkarlanıb.
31 mart 2026-cı ildə tərtib edilmiş akt əsasında restoranın icarədarı Abdullayev Xalıq Hüseyn oğlu barəsində inzibati protokol hazırlanaraq məhkəməyə göndərilib. Sumqayıt Şəhər Məhkəməsinin qərarı ilə o, su təchizatı şəbəkəsinə qanunsuz qoşulmaqla suyun talanmasına görə 1000 manat məbləğində cərimə edilib.
Qurum bildirib ki, su təchizatı şəbəkəsinə qanunsuz qoşulma və sudan qanunsuz istifadə halları qanunvericiliyə uyğun olaraq inzibati, mülki və bəzi hallarda cinayət məsuliyyəti yarada bilər.
***
Sumqayıtdakı Nəsimi adına şəhər mədəniyyət və istirahət parkında fəaliyyət göstərən restoranlardan biri cərimələnib.
Qaynarinfo.az-ın məlumatına görə, "Pine Park" restoranında sayğacdan kənar şəbəkəyə qoşulma faktı aşkar edilib.
Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti tərəfindən restoranı icarə müqaviləsi əsasında işlədən icarədar, 1992-ci ildə Sumqayıt şəhərində anadan olmuş T.R. məsuliyyətə cəlb olunub.
Ona İnzibati Xətalar Məcəlləsinin 262.3-cü maddəsi ilə (su təchizatı şəbəkəsinə qanunsuz qoşulmaqla suyun talanması nəticəsində az miqdarda ziyanın vurulmasına görə) protokol tərtib edilib.
Məlum olub ki, sözügedən restoran "Novator Group" MMC-nin tərkibində fəaliyyət göstərir.
Məhkəmənin hökmü ilə barəsində protokol tərtib olunan şəxs İnzibati Xətalar Məcəlləsinin 262.3-cü maddəsi ilə nəzərdə tutulmuş inzibati xətanın törədilməsində təqsirli bilinib və 1000 manat məbləğində cərimə edilib.
Qeyd edək ki, Sumqayıt Şəhəri, Səməd Vurğun ev 116 ünvanında qeydiyyatda olan, nizamnamə kapitalı 20 manat təşkil edən "Novator Group" MMC-nin qanuni təmsilçisi Əliyev Qədir Vaqif oğludur.
