Sumqayıtda fəaliyyət göstərən restorandan şikayət var.
Sumqayit24.az-a daxil olan məlumata görə, Nəsimi adına Mədəniyyət və İstirahət parkında yerləşən "Axşam" restoranında gecə saatlarınadək yüksək səslə musiqi səsləndirildiyi bildirilib.
"Demək olar ki, hər gün fərqli saatlarda yüksək səslə musiqi səsləndirilir. Xüsusilə axşam saat 21:00-dan sonra səs daha da artır. Bəzi günlərdə musiqi gecə saat 00:00-dək davam edir. Evdə oturmaq belə mümkün olmur", - deyə vətəndaşlar narahatlıqlarını ifadə ediblər.
Sumqayit24.az-ın sorğusuna Dövlət Ekoloji Təhlükəsizlik Xidmətindən bildirilib ki, sözügedən restorandan gələn səs-küylə bağlı Dövlət Ekoloji Təhlükəsizlik Xidmətinə daxil olan şikayət 4 saylı Regional Ekologiya və Təbii Sərvətlər İdarəsinin və Ətraf Mühitin Çirklənməsinin Monitorinq Qrupunun əməkdaşları tərəfindən yerində araşdırılıb.
"Aparılan ölçmə işləri zamanı obyektdən ətrafa yayılan səs-küy səviyyəsinin ətraf mühit üçün yol verilən normadan artıq olduğu müəyyən edilib. Faktla bağlı restoranının rəhbəri Ramiz Musayev barəsində protokol tərtib olunub və onun 2500 manat məbləğində cərimə olunması ilə bağlı qanunamüvafiq tədbirlər görülür",- deyə qurumdan bildirilib.
