Sumqayıtın 9-cu mikrorayonunda zibil qutularının yerinin dəyişdirilməsi sakinlərin narazılığına səbəb olub.
Bu barədə Sumqayit24.az-a ərazi sakinləri məlumat veriblər.
Vətəndaşların iddiasına görə, zibil qutuları 25 və 26 saylı binaların yanındakı əraziyə köçürülüb.
Bu vəziyyət həm gündəlik hərəkətə maneə olur, həm də ərazidə yaşayanlar üçün narahatlıq yaradır:
"Pəncərəni belə açmaq mümkün deyil. Yaxınlıqda 23 və 26 nömrəli məktəb, 54 və 55 nömrəli uşaq bağçaları yerləşir. Yeni tədris ili başlayanda uşaqlar hər gün bu yoldan istifadə edəcəklər. Bundan əlavə, tez-tez burada antisanitar vəziyyət yaranır və ərazidə hərəkət etmək çətinləşir".
Məsələ ilə bağlı Mənzil-Kommunal İstismar Sahəsi Sumqayit24.az-a açıqlama verib.
Qurumdan bildirilib ki, zibil konteynerlərinin yerləşdiyi ərazidə yeni yarımstansiyanın tikintisi aparıldığı üçün qutular müvəqqəti olaraq başqa yerə köçürülüb:
"Çox güman ki, tikinti işləri avqustun sonunadək başa çatacaq. Bundan sonra köhnə yarımstansiya söküləcək və zibil konteynerləri əvvəlki yerinə qaytarılacaq".
