Bakı və Sumqayıt arasında metrobuslar yaradılar bilər. Sumqayıt24 bu barədə 24 oktyabr tarixində Baku.ws-ə istinadən xəbər verir.
Bunu Rəqəmsal İnkişaf və Nəqliyyat Nazirliyi yanında İctimai Şuranın üzvü, nəqliyyat üzrə ekspert Elməddin Muradlı bildirib. Onun sözlərinə görə, tıxacın həlli yolunu tapmaq məqsədilə Baş nazir Əli Əsədovun iştirakı ilə son bir ay ərzində üç dəfə müşavirə keçirilib və ciddi tapşırıqlar verilib:
“Məndə olan məlumata görə, Rəqəmsal İnkişaf və Nəqliyyat Nazirliyi və İqtisadiyyat Nazirliyi Bakı və Sumqayıt şəhərləri arasında tam elektrikli avtobusların istifadəsini, yəni metrobus sisteminin qurulmasını müzakirə edir. Bununla bağlı hazırda özəl şirkətlərlə də fikir mübadiləsi aparılır. Təkliflər hazırlanıb təqdim edildikdən sonra dövlət bunu dəyərləndirəcək. Metrobusdan istifadəyə görə sərnişinlər üçün əlverişli qiymətlər müəyyən ediləcək”.
Elməddin Muradlı onu da qeyd edib ki, əsas hədəf Sumqayıtda ictimai nəqliyyatı inkişaf etdirmək, Sumqayıtdan Bakıya birbaşa avtobus daşımalarını genişləndirməkdir.
