Azərbaycanın görkəmli ictimai-siyasi xadimi Nəriman Nərimanovun abidəsi Sumqayıt şəhərinin Heydər Əliyev prospektində yerləşir.
Heykəl 1964-cü ildə tuncdan tökülərək qırmızı mərmər kürsülük üzərində qoyulub. Abidənin müəllifi tanınmış Azərbaycan heykəltəraşı, SSRİ xalq rəssamı Mirəli Mirqasımovdur.
Nəriman Nərimanovun heykəli şəhərin ən yaşlı monumental abidələrindən sayılır. Sənət əsərində dahi şəxsiyyətin xarakterik geyim tərzi, başını dik tutaraq iti nəzərlərlə irəliyə baxması aydınca oxunur. Çiyninə salınmış plaşın altından çıxan sağ əlin jesti, simasında ifadə olunan qətiyyət sanki gizli əlaqəyə girərək obrazın mənəvi aləminin açılmasına şərait yaradır.
Nəriman Nərimanov 1870-ci ildə Tiflisdə (Tbilisi) anadan olub. O, ilk biliyini şəhərin ruhani məktəbində alıb. Daha sonra isə təhsilini Qori Müəllimlər Seminariyasında davam etdirib. 28 aprel 1920-ci ildə Azərbaycan Xalq Cümhuriyyəti süqut etdikdən və Azərbaycan SSR elan olunduqdan sonra N. Nərimanov Azərbaycan SSR Müvəqqəti İnqilabı Komitəsinin sədri və Xalq Komissarları Sovetinin Sədri vəzifəsinə təyinat alıb. 1922-ci ildə isə SSRİ Mərkəzi İcraiyyə Komitəsinin sədrlərindən biri seçilib.
Ümummilli lider Heydər Əliyevin təşəbbüsü ilə Nəriman Nərimanovun ictimai-siyasi fəaliyyəti layiqli qiymətini aldı, anadan olmasının 100 illiyi təntənə ilə qeyd olundu.
