Sumqayıt şəhərinin Bulvar ərazisində son illər yaşayış komplekslərinin və əhali sayının sürətlə artmasına baxmayaraq, sosial infrastrukturun kifayət qədər inkişaf etməməsi narahatlıq doğurur.
Sumqayit24.az-a daxil olan məlumata görə, sözügedən yerdə ümumtəhsil məktəbi fəaliyyət göstərmir. Bu isə xüsusilə məktəb yaşlı uşaqları olan ailələrin gündəlik həyatını çətinləşdirir. Bundan əlavə, ərazidə bağça qıtlığı yaşanır.
Sakinlərin sözlərinə görə, ərazidə iki uşaq bağçası mövcuddur. Lakin onlardan biri uzun müddətdir istifadəyə verilmir.
"MİDA yaşayış kompleksinin yaxınlığında böyük uşaq bağçası var. Ancaq həmin bina hələ də fəaliyyətə başlamayıb. Hazırda ərazidə fəaliyyət göstərən yeganə məktəbəqədər təhsil müəssisələrindən biri "Levent" yaşayış şəhərciyinin binalarının altında yerləşən kiçik özəl bağçadır. Lakin bu bağça bölgədə yaşayan bütün ailələrin tələbatını qarşılamaq gücündə deyil", - deyə vətəndaşlar bildiriblər.
Bundan əlavə, sakinlər qeyd edirlər ki, məktəb olmadığı üçün uşaqlar təhsil almaq məqsədilə şəhərin digər hissələrində yerləşən məktəblərə getməyə məcbur qalırlar. Bu isə həm vaxt itkisinə, həm də əlavə nəqliyyat xərclərinə səbəb olur.
Vətəndaşlar aidiyyəti qurumlardan əraziyə baxış keçirilməsini və problemin araşdırılmasını xahiş edirlər.
Qeyd edək ki, məsələ ilə bağlı aidiyyəti quruma sorğu ünvanlanıb.
