Əslən Lerikin Gəndov kəndindən olan, Sumqayıtda dünyaya gələn həmyerlimiz Zaur Cəlil ABŞ-nin paytaxtı Vaşinqtonda xüsusi təyinatlı polis zabiti təyin olunub.
Qafqazinfo.az-ın məlumatına görə, 1985-ci il təvəllüdlü Zaur Cəlil 2006-cı ildən Birləşmiş Ştatlarda yaşayır.
O, uşaq yaşlarından peşəkar cüdo ilə məşğul olub. Bu idman növü üzrə üçqat ABŞ çempionudur. 4 il ardıcıl olaraq Birləşmiş Ştatların ən yaxşı cüdoçusu adına layiq görülüb.
ABŞ Polis Akademiyasını fərqlənmə diplomu və medalı ilə başa vurub. Bir neçə gün əvvəl isə yaşadığı ölkənin təhlükəsizliyinin keşiyində durmaq üçün təyinat alıb.
Qeyd edək ki, Vaşinqtonun xüsusi təyinatlı polisləri şəhər meri tərəfindən təyin edilir.
