Sumqayıt şəhərində mütəmadi şəkildə ətrafa yayılan tüstü problemi ciddi narahatlıq doğurur.
Sumqayit24.az-a bu barədə Sülh prospekti, Nadir Balakişiyev küçəsində yerləşən "Yeni Sumqayıt" yaşayış kompleksinin sakinləri məlumat veriblər.
Şikayətçilərin sözlərinə görə, zavodlardan birindən xüsusilə gecə saatlarında yayılan tüstü ətrafı ciddi şəkildə çirkləndirir və havanın keyfiyyətinə mənfi təsir göstərir.
"Həftə ərzində 3-4 dəfə belə halla qarşılaşırıq. Bu vəziyyət sağlamlığımıza mənfi təsir göstərir və ərazidə yaşayışı çətinləşdirir", - deyə vətəndaşlar narahatlıqlarını bildiriblər.
Dövlət Ekoloji Təhlükəsizlik Xidmətindən Sumqayit24.az-a məsələ ilə bağlı açıqlama verilib.
Qeyd olunub ki, sözügedən ərazidə fəaliyyət göstərən zavoddan havaya tüstünün yayılması ilə bağlı Dövlət Ekoloji Təhlükəsizlik Xidmətinə daxil olan şikayət 4 saylı Regional Ekologiya və Təbii Sərvətlər İdarəsi və Xəzər Kompleks Ekoloji Monitorinq İdarəsinin əməkdaşları tərəfindən araşdırılıb.
"Araşdırma zamanı "Azercathode" MMC-yə məxsus mis emalı zavodundan havaya atılan zərərli qaz qarışıqlarının miqdarının normadan artıq olduğu məlum olub.
Faktla bağlı akt və MMC barəsində hüquqi şəxs qismində inzibati protokol tərtib edilərək qərar çıxarılması üçün toplanmış materiallar Sumqayıt Şəhər Məhkəməsinə göndərilib.
Bununla yanaşı, zavodun fəaliyyətinin məhdudlaşdırılması ilə bağlı aidiyyəti qurumlara müraciət olunub", - açıqlamada qeyd olunub.
