Avqustda ilin ən möhtəşəm meteor yağışlarından biri müşahidə olunacaq.
Astronomların məlumatına görə, Perseid meteor axını iyulun 17-dən avqustun 24-dək davam edəcək. Yağışın ən yüksək aktivliyi isə avqustun 13-nə keçən gecə qeydə alınacaq.
Pik dövrdə əlverişli hava şəraitində saatda 100–150-yə qədər meteor müşahidə etmək mümkün olacaq. Perseidlər Yer planetinin Svift-Tattl kometinin orbitində qalan toz və hissəciklər axınından keçməsi nəticəsində yaranır.
Mütəxəssislər bildirirlər ki, meteor axınını izləmək üçün ən uyğun məkanlar şəhər işıqlarından uzaq ərazilərdir. Xüsusilə səhərə yaxın saatlarda müşahidə şəraiti daha əlverişli olur.
Qeyd edək ki, Perseidlər Şimal yarımkürəsində hər il müşahidə olunan ən məşhur və ən parlaq meteor axınlarından biri hesab edilir və həm astronomlar, həm də səma həvəskarları tərəfindən böyük maraqla izlənilir.
