Bakı-Sumqayıt elektrik qatarlarının sayı artırılır.
Sumqayıt24 xəbər verir, sürət qatarları yeni dərs ilinin başlaması ilə əlaqədar sentyabrın 16-dan yenilənmiş hərəkət cədvəli ilə fəaliyyət göstərəcək. Yeni qrafikə əsasən, Bakı-Xırdalan-Sumqayıt marşrutu üzrə reyslərin sayı 20-dən 24-ə, Bakı-Pirşağı-Sumqayıt xətti üzrə isə 36-dan 42-yə çatdırılıb.
Yenilənmiş qrafikə uyğun olaraq, Bakı-Xırdalan-Sumqayıt marşrutu üzrə Bakıdan 13, Sumqayıtdan 11 reys, Bakı-Pirşağı-Sumqayıt xəttində isə Bakıdan 20, Sumqayıtdan 22 reys təşkil ediləcək.
“Azərbaycan Dəmir Yolları” QSC sərnişindaşıma xidmətinin keyfiyyətini yüksəltmək üçün Pirşağı-Sumqayıt sahəsində infrastrukturu sağlamlaşdırır. Təmir işlərinin qismən tamamlanması nəticəsində Bakı-Pirşağı-Sumqayıt xətti üzrə sərnişinlərin çoxdan gözlədiyi 4 ənənəvi səhər reysi bərpa olunub. Həmçinin biri səhər, biri axşam olmaqla 2 yeni reys əlavə edilib.
Bakı-Xırdalan-Sumqayıt marşrutunun yenilənmiş qrafikində isə Bakı-Xırdalan, Bakı-Sumqayıt və Xırdalan-Bakı istiqamətində 3 yeni axşam reysi, Sumqayıt-Bakı istiqamətinə isə 1 yeni səhər reysi əlavə olunub.
“Pirşağı-Sumqayıt sahəsində davam edən təmir-sağlamlaşdırma işlərinin bu ilin sonunadək yekunlaşmasından sonra Bakı-Pirşağı-Sumqayıt xətti üzrə hərəkət qrafikinə yenidən baxılacaq və sərnişin tələbatına uyğun əlavə və dəyişikliklər nəzərdən keçiriləcək”, - deyə qurumdan bildirilib. [modula id="60932"]
