Gənclər Evində “Erkən nikah və qohumlar arasında nikahın mənfi nəticələri” mövzusunda görüş keçirilib. Sumqayıt24 bu haqda Ailə, Qadın və Uşaq Problemləri üzrə Dövlət Komitəsinə istinadən xəbər verir.
Tədbirdə Xidmət Sahələri üzrə Sumqayıt Dövlət Peşə Təhsil Mərkəzinin tələbələri və onların valideynləri, ümumilikdə isə 130 nəfər iştirak edib. Dövlət Komitəsinin Ailə məsələləri şöbəsinin müdir müavini Kamila Əliyeva təqdimatla çıxış edərək, erkən nikahın və qan qohumları arasında nikahların mənfi nəticələrindən danışıb. Bu cür halların qarşısını almaq üçün görülən işləri nəzərə çatdırıb.
K.Əliyeva ölkəmizdə erkən nikah və uşaq evliliklərinin gender əsaslı zorakılığın bir növü kimi dəyərləndirildiyini vurğulayıb. Belə hallarla üzləşənlərə Komitə yanında fəaliyyət göstərən qaynar xəttə (860) müraciət etməyi tövsiyə edib.
Təhsil Mərkəzinin direktoru Gülşən Ömərova isə yeniyetmə və gənclərə ailə öhdəliklərini tam məsuliyyətlə öz üzərinə götürməyə hazır olduqdan sonra ailə həyatı qurmağı tövsiyə edib.
Daha sonra suallar cavablandırılıb, “Erkən nikahın və qohum evliliyinin ana və uşaqların sağlamlığına mənfi təsirləri” adlı məlumatlandırıcı çap vəsaiti paylanılıb. Sonda “Erkən nikaha YOX deyək!” adlı vedioçarx nümayiş olunub.
