Sumqayıt şəhər Uşaq Xəstəxanasında rəhbər heyətin mülki müdafiə məşqləri keçirilib. Bu haqda 31 mart tarixində Sumqayıt24 Sumqayıt Tibb Mərkəzinə (STM) istinadən xəbər verir.
Təlim "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunu əhatə edib. Məşq 4 siqnal üzrə həyata keçirilib:
- İlk siqnalda zəlzələ nəticəsində xəstəxananın poliklinika şöbəsinin binasında dağıntılar və tələfatın olduğu bildirilib.
- İkinci siqnalda baş vermiş zəlzələnin təsirindən Sumqayıt şəhər Etilen-polietilen zavodunda 5 tonluq xlor çəninin dağılaraq ətrafa yayıldığı və nəticədə kimyəvi zəhərlənmələrin olduğu qeyd edilib.
- Üçüncü siqnal əsasında həyata keçirilən mülki müdafiə məşqində bildirilib ki, əsasən, baş vermiş zəlzələnin təsirindən Sumqayıt şəhər 9-cu mk/da içməli su xətləri dağılıb, çirkab su bir çox yerlərdə içməli suya qarışıb. Nəticədə şəhərdə infeksion, epidemik xəstəliklərin yaranması və yayılması təhlükəsi yaranıb.
- Sonuncu siqnalda xəstəxananın qazanxana yerləşən binasında qaz sızması nəticəsində partlayış olduğu vurğulanıb. Yaranan yanğın nəticəsində xəsarət alanların olduğu qeyd olunub.
Çıxış edən mülki müdafiə qərargahının üzvləri hər 4 halda təhlükələrin aradan qaldırılması istiqamətində həyata keçirilən tədbirlərdən geniş bəhs ediblər. Sonda təlimin təhlili aparılıb.
