FHN-in Sumqayıt Regional Mərkəzində məktəblilər üçün “açıq qapı günü” keçirilib. Bu haqda 5 may tarixində Sumqayıt24 Fövqəladə Hallar Nazirliyinə (FHN) istinadən xəbər verir.
“Heydər Əliyev və Azərbaycan gəncliyi” devizi ilə keçirilən tədbirdə iştirakçılar ümummilli lider Heydər Əliyevin Mərkəzin binasındakı büstünü ziyarət edərək önünə gül dəstələri qoyublar. Burada FHN-in Regional Mərkəzinin məsul şəxsləri, yerli qurumların, hüquq mühafizə orqanlarının rəhbərləri və ictimaiyyət nümayəndələri iştirak ediblər.
Tədbir öz işinə Dövlət Bayrağının meydana gətirilməsi və Himnin səsləndirilməsi ilə başlayıb. Daha sonra Sumqayıt məktəblilərinin və 1 nömrəli Uşaq-Gənclər İnkişaf Mərkəzinin dərnək üzvlərinin ifasında musiqi nömrələri, ədəbi-bədii kompozisiyalar, səhnəcik və rəqslərlə davam edib.
Ulu öndər Heydər Əliyevin həyat və fəaliyyətini əks etdirən nəşrlərdən və rəsm əsərlərindən ibarət sərgiyə də baxış keçirilib.
Sonda ümummilli lider Heydər Əliyevin 100 illik yubileyi ilə əlaqədar Mərkəzin ərazisində 100 ədəd ağac və gül kolları əkilib.
