Sumqayıtda yerləşən yataqxanalardakı şəraitsizliklərlə bağlı şikayət var.
Sumqayit24.az-a daxil olan məlumata görə, 9 və 11 saylı yataqxanalarda uzun müddətdir ki, həm yaşayış şəraiti, həm də kommunikasiya sistemlərinin vəziyyəti ilə bağlı ciddi problemlər mövcuddur. Bu cür hal isə sakinlərdə daimi narahatlıq və narazılıq yaradıb.
Vətəndaşların məlumatına əsasən, yataqxanalarda, mərtəbələrdə və elektrik şitlərində tez-tez yanğın hadisələri baş verir.
"Yataqxanadakı sanitar qovşaqları da yararsız vəziyyətdədir. Kanalizasiya və su borularının işləməməsi səbəbindən həm suyun verilişində, həm də çirkab sularının axıdılmasında ciddi problemlər yaşanır. Boruların tamamilə tutulması isə vəziyyəti daha da gərginləşdirərək problemi davamlı hala gətirib",- deyə şikayətçilərdən biri bildirib.
Sakinlərin sözlərinə görə, xüsusilə 11 saylı yataqxanada durum daha da ağırdır:
"Bir müddət əvvəl burada baş verən qaz sızması nəticəsində partlayış olub və həmin faciədə bir ailənin iki üzvü həyatını itirib. Hadisədən sonra yataqxanaya qaz verilişi tam dayandırılıb və bu günə qədər bərpa olunmayıb".
Ümumilikdə, hər iki yataqxanadakı mövcud şərait insanların həyatına və sağlamlığına real təhlükə yaradır.
Bir sözlə, şikayətçilər aidiyyəti qurumlardan yataqxanalara baş çəkilməsini və sadalanan problemlərin aradan qaldırılmasını tələb edirlər.
