Sumqayıtda şəhidlərin xatirəsinə həsr olunmuş şəkillərlə bağlı redaksiyamıza daha bir şikayət daxil olub.
Sumqayit24.az-a müraciət edən sakinin sözlərinə görə, problem bu dəfə 45-ci məhəllədə, "Əyri dom" kimi tanınan 5 mərtəbəli yaşayış binasının yanında qeydə alınıb.
Redaksiyamıza təqdim olunan görüntüdə ət satışı və kəsimi həyata keçirilən obyektin qarşısında yerləşdirilmiş inək və qoyun təsvirinin yanında Vətən müharibəsi şəhidi Emil Abduləzimlinin xatirəsinə həsr olunmuş plakatın asıldığı görünür.
Yerli sakin bunun etik olmadığını bildirib və şəhidin xatirəsinə hörmətsizlik kimi dəyərləndirib:
"Vicdanım götürmədi, özümə sığışdıra bilmədim, sizə göndərdim. Belə şey olmaz".
Vətəndaş aidiyyəti qurumdan əraziyə baxış keçirilməsini və problemin həll edilməsini tələb edib.
Xatırladaq ki, avqustun 1-də Sumqayit24.az 17-ci mikrorayon, 44 saylı binanın fasadında yerləşən şəhidin şəklinin solması ilə bağlı da şikayət işıqlandırıb.
