Avrasiya Logistika Alyansına daxil olan şirkətlərin rəhbərləri Sumqayıt Kimya Sənaye Parkında olublar. Bu barədə 8 oktyabr tarixində Sumqayıt24 xəbər verir.
Onlar Sənaye Parkında görülmüş işlər, “STP” MMC-nin Kabel Zavodu və “ALCO” MMC-nin Sürtkü yağlarının istehsalı müəssisəsi ilə tanış olublar. Sonra nümayəndə heyəti ilə İqtisadi Zonaların İnkişafı Agentliyinin (İZİA) İdarə Heyətinin sədri Elşad Nuriyev arasında görüş keçirilib.
20-dən çox şirkət nümayəndəsinin iştirak etdiyi görüşdə sənaye zonaları və aqroparklar, burada sahibkarlar üçün mövcud investisiya imkanları, tətbiq edilən vergi və gömrük güzəştləri barədə məlumat verilib, sənaye zonaları və aqroparkları barədə təqdimat təşkil edilib.
Həmçinin Cəbrayıl rayonunda yerləşən “Araz Vadisi İqtisadi Zonası” Sənaye Parkının logistik imkanları, burada və Sumqayıt Kimya Sənaye Parkında yaradılacaq gömrük anbarlarından söz açılıb.
Qeyd edək ki, Avrasiya Logistika Alyansı gömrük və logistika sahəsində fəaliyyət göstərən şirkətləri özündə birləşdirir.
