Sumqayıtda avtobus sürücüsünün davranışı ictimai qınağa səbəb olub.
Sosial şəbəkələrdə yayılan məlumata və videoya görə, 7 nömrəli marşrut xəttinin sürücüsü sərnişin dolu avtobusun sükanı arxasında olarkən TikTok platformasında canlı yayım açan xanıma baxıb, ona hədiyyələr atıb, qarşısındakı yola isə diqqət etməyib.
Bununla o, sərnişinləri və digər hərəkət iştirakçılarını təhlükəyə atmış sayılır.
Azərbaycan Yerüstü Nəqliyyat Agentliyindən (AYNA) Sumqayit24.az-ın sorğusuna cavab olaraq bildirilib ki, görüntü araşdırılıb, sürücü barədə müvafiq tədbir görmək tapşırığı verilib və həmin şəxs artıq işdən azad olunub:
"Avtobus sürücülərinin işə qəbulu daşıyıcılar tərəfindən həyata keçirilir. Daşıyıcılarla keçirilən görüşlərdə mütəmadi olaraq onlara müvafiq tapşırıqlar verilir. AYNA tərəfindən Sumqayıt şəhərində marşrut avtobuslarının sürücüləri ilə bağlı mütəmadi monitorinqlər aparılır. Hər hansı nöqsanlar aşkarlandığı təqdirdə müvafiq tədbirlər görülür. Daxil olan bütün müraciətlər də ətraflı araşdırılır".
