2020-ci ildə qəbul imtahanında respublika birincisi olan sumqayıtlı Murad Mustafazadə təhsil həyatındakı uğurlarını xaricdə davam etdirir.
Sumqayit24.az xəbər verir ki, Sumqayıt şəhəri Təbiət Elmləri Təmayüllü Gimnaziyanın məzunu olan Murad həmin il qəbul imtahanının iki mərhələsinin nəticəsinə əsasən 688,4 bal toplayaraq II qrup üzrə ən yüksək nəticəyə imza atıb.
Murad 2020-ci ildə gimnaziyanı "Qızıl medal" və "Xüsusi nümunəli attestat"la bitirib. Bundan əvvəl də dəfələrlə respublika olimpiadalarının qalibi olub və yüksək nəticələrinə görə Prezident təqaüdünə layiq görülüb.
O, Türkiyənin nüfuzlu Orta Doğu Texniki Universitetində (ODTÜ) tam təqaüdlə ingilis dilində təhsil almağa başlayıb. Universitet illərində hər kursda göstərdiyi yüksək nəticələrə görə professor-doktor Fikret Şenses mükafatına layiq görülüb, eyni zamanda müəllim köməkçisi kimi çalışıb və beynəlxalq "Zorlu" şirkətində təcrübə keçib.
Murad təhsilini Erasmus proqramı çərçivəsində Almaniyanın Vürzburq Universitetində bir semestr davam etdirib.
2024-cü ildə ODTÜ-ni iki ixtisas üzrə "Yüksək şərəflə" və birinci dərəcəli diplomla bitirən Murad həmin il Azərbaycan Respublikasının Xaricdə Təhsil üzrə Dövlət Proqramının qalibi olub. O, ABŞ-nin nüfuzlu Texas Universitetində magistratura təhsili almaq hüququ qazanıb.
2026-cı ildə magistraturanı yüksək nəticələrlə başa vuran Murad hazırda təhsilini ABŞ-də davam etdirir. O, Arizona Universitetində doktorantura proqramına qəbul olunaraq elmi fəaliyyətinə başlayıb.
Beləliklə, 2020-ci ildə II qrup üzrə respublika birincisi olan sumqayıtlı Murad Mustafazadə 6 il ərzində Türkiyə, Almaniya və ABŞ-də təhsil alaraq akademik yolunu davam etdirib.
