Əvvəlki illərdə qəbul imtahanlarında 700 bal toplayan Sumqayıt məktəblərinin məzunlarının hazırda hansı sahələrdə çalışdığı və yüksək nəticənin onların karyerasına necə təsir etdiyi ilə bağlı araşdırma apardıq.
2017-ci ildə Təbiət Elmləri Təmayüllü Gimnaziyanı bitirən Eldar Əfəndiyev Sumqayit24.az-ın suallarını cavablandırıb.
Onun sözlərinə görə, universitetin ilk illərində yüksək nəticə müəllimlərdə müsbət təəssürat yaratsa da, sonrakı karyera həyatında bunun əhəmiyyətli təsiri olmayıb.
Məzun bildirib ki, universiteti üç il əvvəl başa vurduqdan sonra birbaşa Almaniyaya gedib. Hazırda isə burada uzmanlıq təhsilini davam etdirir və neyrocərrahiyyə üzrə rezident həkim kimi fəaliyyət göstərir.
Beləliklə, vaxtilə qəbul imtahanında maksimum nəticə göstərən Sumqayıt məzunlarının karyera yolları fərqli istiqamətlərdə davam edib. Onlardan biri təhsil sahəsində müəllim kimi çalışır, digəri isə Almaniyada neyrocərrahiyyə üzrə ixtisaslaşır.
2018-ci ildə Təbiət Elmləri Təmayüllü Gimnaziyanı bitirən Cahan Haşımzadə də Sumqayit24.az-ın suallarını cavablandırıb.
- Topladığınız 700 balın karyera həyatınıza hansı müsbət təsiri olub?
- 700 bal toplamağımın karyera həyatımda ilk və ən böyük təsirlərindən biri universitet seçimində ən yaxşı imkanlardan birini əldə etməyim oldu. Həmin il ADA Universiteti 700 bal toplayan tələbələrə ödənişsiz təhsil imkanı yaradırdı. Mən də bu fürsətdən yararlanaraq ADA Universitetində Biznesin İdarə Edilməsi ixtisasını seçdim və yaxşı təhsil almaq imkanı qazandım.
Düşünürəm ki, yüksək nəticə sonrakı iş və karyera həyatımda da mənə bir çox qapılar açdı. Güclü akademik nəticənin və yaxşı universitetdə təhsil almağın yaratdığı imkanlar gələcəkdə qarşıma çıxan fürsətləri dəyərləndirməyimə kömək etdi.
700 bal toplamağın mənim üçün digər təsiri isə özünəinamımla bağlı oldu. Nəticəmi eşidən insanların reaksiyası mənim üçün maraqlı təcrübə idi və bu uğur özünəinamıma ciddi təsir göstərdi. Mən də bu özünəinamdan özümü inkişaf etdirmək və daha böyük məqsədlər qoymaq üçün istifadə etməyə çalışdım.
- Hazırda hansı sahə üzrə və harada çalışırsınız? Təhsil aldığınız ixtisas üzrə fəaliyyət göstərirsinizmi?
- Bakalavriatdan sonra eyni universitetdə Təhsilin İdarə Edilməsi üzrə magistratura təhsili almışam. Hazırda Landau School-da ingilis bölməsinin Secondary School pilləsində riyaziyyat müəlliməsi kimi çalışıram.
Bakalavr təhsilim birbaşa müəllimliklə bağlı olmasa da, magistratura təhsilimin və peşəkar fəaliyyətimin istiqaməti təhsil sahəsində davam edib. Biznes təhsili zamanı qazandığım analitik düşüncə və idarəetmə bacarıqları ilə yanaşı, Təhsilin İdarə Edilməsi üzrə magistratura təhsilim də hazırkı fəaliyyətim üçün faydalı olub.
Bir vaxtlar 700 bal toplamış abituriyent kimi, bu gün həmin yoldan keçən şagirdlərimə yüksək nəticələr əldə etməkdə kömək etmək mənim üçün həm motivasiya, həm də qürur mənbəyidir.
