Sumqayıt sakinləri Sumqayıt-Bakı qatarlarının qrafikindən narazıdırlar.
Onların sözlərinə görə, əvvəllər səhər saat 05:00-dan 06:00-a qədər Sumqayıtdan Bakıya iki qatar yola düşürdüsə, hazırda həmin saatlarda yalnız bir qatar fəaliyyət göstərir. İki qatarın bir qatarla əvəzlənməsi nəticəsində sərnişin sıxlığı artıb və insanlar işdən çıxarkən uzun müddət qatar gözləməli olurlar.
Sürət qatarının sərnişinlərindən biri olan xanım "Azərbaycan Dəmir Yolları" QSC barədə şikayətini belə bildirib:
"Həyatımda ilk dəfə hansısa Azərbaycan qurumunun insanların çətin vəziyyətini görüb onlara kömək edəcəyini düşünmüşdüm. Sevinmişdim. Amma yanıldım. Özü də çox pis yanıldım".
İki dolu qatardakı insanları birləşdirib bir qatara yığmaq qərarına gəldilər. Mən işdən çıxanda bir saata yaxın qatar gözləyirəm. Hələ bir üstəlik, oturacağam, oturmayacağam, qatara minəcəyəm, minməyəcəyəm dərdini və stresini çəkirəm.
Mən sizin məntiqinizi başa düşmürəm. Siz nə istəyirsiniz? İnsanların işdən sonra qadın, kişi, uşaq, yaşlı bir-birini əzə-əzə getməsindən, insanların bu vəziyyətə düşməsindən həzz alırsınız? Mən niyə adam kimi, insan kimi hər səhər və axşam işə getmək yerinə bu vəziyyətdə getməliyəm?"
Sumqayit24.az məsələ ilə bağlı "Azərbaycan Dəmir Yolları" QSC-yə sorğu ünvanlayıb.
