Böyük şəhərlər arasında ali məktəblərə qəbul göstəricilərində Sumqayıt birinci yerdədir.
Dövlət İmtahan Mərkəzinin "Abituriyent" jurnalının 12-ci nömrəsindəki məlumatlara görə, şəhərdən imtahanlarda iştirak edən 2759 oğlan abituriyentin 44,26%, 2720 qız abituriyentin isə 49,85% ali təhsil müəssisələrinə qəbul olunub. Bu göstəricilər respublika üzrə orta nəticələrdən (oğlanlarda 37,03%, qızlarda 41,91%) xeyli yüksəkdir.
Dövlət sifarişi ilə qəbulda da Sumqayıt ön sıralardadır. Oğlan abituriyentlərin 27,87 faizi, qızların isə 29,74 faizi büdcə hesabına təhsil almaq hüququ qazanıb.
Təhsil eksperti Sona Əliyeva bildirib ki, bu nəticə təsadüfi deyil. Onun fikrincə, Sumqayıtda illərlə formalaşmış təhsil mühiti, valideynlərin təhsilə ciddi yanaşması, hazırlıq imkanları və Bakıya yaxınlıq mühüm rol oynayır.
"Sumqayıt nə resurs çatışmazlığı yaşayan rayonlar, nə də Bakı kimi həddindən artıq dağınıq təhsil mühitinə malikdir. Burada akademik rəqabət formalaşıb və ali təhsil ailələrin sosial yüksəliş yolu kimi qəbul olunur", – deyə ekspert bildirib.
Əliyeva qeyd edib ki, Sumqayıt abituriyentləri həm şəhərdəki imkanlardan, həm də Bakıdakı müəllim və kurslardan yararlana bilirlər. Onun sözlərinə görə, yüksək nəticələr məktəb-valideyn-şagird əməkdaşlığının uğurlu modelindən xəbər verir.
Ekspert qızların qəbul göstəricisinin daha yüksək olmasını da müsbət hal kimi qiymətləndirib: "Bu, ailələrin qızların təhsilinə və gələcək müstəqilliyinə verdiyi önəmi göstərir".
Sona Əliyeva hesab edir ki, Sumqayıtın təhsil uğuru ayrıca araşdırılmalı, burada formalaşan müsbət təcrübənin digər şəhər və rayonlarda tətbiqi imkanları öyrənilməlidir.
Mənbə: Aqreqator.az
