Sumqayıtda ağac aşaraq qadının boynunu qırıb. Bu haqda 11 oktyabr tarixində BakuTV-yə istinadən xəbər veririk.
Hadisə 28 sentyabr tarixində 18-ci mikrorayon ərazisində baş verib. Külək səbəbindən qırılan ağac Akif Nuriyevin idarə etdiyi avtomobilin üzərinə aşıb. Nəticədə sərnişin qismində maşında əyləşən onun həyat yoldaşı, 39 yaşlı Tamella Nuriyeva xəsarət alıb. Qadın xəstəxanaya yerləşdirilib.
Akif Nuriyev hazırda çarəsiz vəziyyətdə olduğunu deyir: “Hansı quruma gedirik, heç biri bizə baxmır. Yaşıllaşdırma İdarəsindən sığorta şirkətinə, sığorta şirkətindən isə idarəyə yönləndirilirik”.
Onun sözlərinə görə, xanımının əməliyyat xərci 6 min manata başa gəlib, avtomobilə dəyən ziyan isə 5 min manat civarındadır. O, bu pulu borc-xərcə girərək topladığını bildirib.
Yaşıllaşdırma idarəsinin baş mühəndisi Mübariz Süleymanov açıqlamasında həmin ağacın iki il öncə budandığını qeyd edib. Məlum hadisədən sonra əraziyə baxış keçirilib. İnkişafda olan bu ağacın külək səbəbindən aşdığı təsdiqini tapıb. Vətəndaşa idarənin heç bir günahının olmadığı başa salınıb.
Avtomobilin icbari sığortasını həyata keçirən “Xalq Sığorta”dan da məsələyə aydınlıq gətirilib.
“İcbari Sığorta qarşı tərəfə dəyən ziyanı ödəyir. O avtomobilin kasko sığortası yoxdur. Olsa belə, o sığorta maşına aiddir, içindəki vətəndaşa aid deyil. Üçüncüsü, xanımın sığortası olsa idi, onu sığorta şirkətindən ala bilərdi. Xanımın sığortası olmadığı halda, o, sığorta sisteminin heç birindən məbləğ ala bilməyəcək.
Hüquqşünas Xəyal Bəşirov da məsələ ilə bağlı danışıb. O qeyd edib ki, hər bir halda vətəndaşa dəymiş ziyan sığorta bürosu tərəfindən ödənilməlidir.
Akif Nuriyev məhkəməyə müraciət edəcəyini bildirib.
