Sumqayıtda avtobuslar arasında intervalın böyük olması sakinlərə çətinlik yaradır. Sumqayıt24 bu barədə 5 sentyabr tarixində Xəzər Xəbər-ə istinadən məlumat verir.
Söhbət 12 nömrəli marşrut xəttindən gedir. ''Stansiya Sumqayıt'' ərazisində yerləşən şəhərciyin sakinlərinin sözlərinə görə, hər dəfə şəhərin mərkəzinə getmək istəyəndə uzun müddət yollarda gözləməli olurlar. Bəzən məcburiyyətdən taksidən istifadə edirlər.
“Marşrutlar 40 dəqiqədən,1 saatdan bir gəlir, həmçinin dolu olur. Pullarımız taksilərdə qalıb. Yaxşı olardı ki, 20 Yanvara da işləyən avtobus olardı”, - deyə sərnişinlər bildiriblər.
Sözügedən marşrut xətti Sumqayıt şəhər İcra Hakimiyyətinin balansındadır.
Nəqliyyat 1 MMC-nin qaraj rəisi Sirac Səfərov bildirib ki, bunun səbəbi sürücü çatışmazlığıdır. Nəticədə bəzi avtobuslar qarajda qalıb və xəttə buraxılmır. O əlavə edib ki, çətinlik aradan qaldırıldıqdan sonra avtobusların sayı artırılacaq.
