Artıq Bakı-Sumqayıt marşrutlarında da xarici emissiyalı bank kartları ilə təmassız ödəniş etmək mümkündür.
Sumqayit24.az-a bu barədə Azərbaycan Yerüstü Nəqliyyat Agentliyindən (AYNA) məlumat verilib. Bildirilib ki, Azərbaycanda ictimai nəqliyyatda xarici bank kartları ilə ödəniş imkanı yaradılıb. Yenilik Bakı və Gəncə şəhərləri ilə yanaşı, Bakı-Sumqayıt marşrutlarında da tətbiq olunur.
Məlumata görə, xarici emissiyalı bank kartları vasitəsilə NFC texnologiyası əsasında təmassız ödəniş etmək mümkündür. Bununla da xarici vətəndaşlar, turistlər və ölkəyə gələn qonaqlar əlavə kart almadan beynəlxalq bank kartları ilə ictimai nəqliyyatdan istifadə edə biləcəklər.
Qeyd edək ki, bundan əvvəl yalnız yerli bank kartları ilə NFC ödəniş sistemi aktiv idi.
