Azərbaycanda yol-nəqliyyat hadisələrinin baş verdiyi magistrallar arasında Bakı–Sumqayıt avtomobil yolu da diqqət çəkir. Paytaxtla Sumqayıt arasında hər gün minlərlə avtomobilin hərəkət etdiyi bu istiqamət qəza riski baxımından xüsusi diqqət tələb edən yollardan biridir.
Sumqayit24.az xəbər verir ki, Daxili İşlər Nazirliyinin Nəqliyyatı İntellektual İdarəetmə Mərkəzinin məlumatına görə, 2025-ci ildə Bakıda müşahidə kameralarının əhatə etdiyi yollarda 2546 yol-nəqliyyat hadisəsi qeydə alınıb.
Qəzaların daha çox müşahidə olunduğu istiqamətlər sırasında Bakı–Sumqayıt və Aeroport şoseləri, Sabunçu–Zabrat yolu, eləcə də paytaxtın bir sıra əsas prospektləri yer alıb.
Mərkəz qəzaların əsas səbəbləri arasında yüksək sürəti, işıqforun qadağanedici siqnalına əməl edilməməsini, ara məsafəsinin pozulmasını və sürücü diqqətsizliyini göstərib.