Bu gün Vətən müharibəsi şəhidi baş leytenant İlkin Məmmədzadənin anım günüdür.
İlkin Məmmədzadə 19 dekabr 1991-ci ildə Sumqayıt şəhərində anadan olub. Orta təhsilini 42 saylı məktəbdə, ali təhsilini isə Aqrar Universitetinin Balıqçılıq Təsərrüfatı ixtisasında alıb. Bu müddət ərzində Gənclər Təşkilatına sədrlik edib, "Xəmsə" və "Breyn Rinq" yarışmalarının iştirakçısı olub. 2012-ci ildə universiteti Qırmızı diplomla başa vurmuşdur. Magistraturanı da həmin təhsil ocağında oxuyan şəhidimiz, hərbi xidmətdən sonra elmi fəaliyyətlə məşğul olmuşdur.
İlkin 2016-cı ilin iyun ayından leytenant kimi xidmətə başlayıb. Nümunəvi xidmətinə görə 2020-ci ilin iyun ayında "Baş leytenant" rütbəsini alıb. Müharibə zamanı 21 nəfərə yaxın yaralı hərbçini döyüş meydanından çıxarmışdır. 7 oktyabr 2020-ci ildə saat 10:00 radələrində isə Tərtər-Ağdərə istiqamətində "Tülkü Dərəsi" adlanan ərazidə qəhrəmancasına şəhid olmuşdur.
O, 8 oktyabr 2020-ci ildə Sumqayıt Şəhidlər xiyabanında dəfn edilib.
