"Bu şəhərdə"nin konsertində kuryoz hadisə baş verib. Tamaşa başlamamışdan əvvəl, bir qadın guya ərinin başqa bir qadınla tamaşaya gəldiyini görüb. "Qəzəblənmiş" qadın dolu zalın önündə ərinə yaxınlaşaraq qışqıra-qışqıra onu sorğu-suala çəkib, daha sonra qadına hücum edib.
Respublikanın Əməkdar artisti Coşqun Rəhimov "Bu Şəhərdə - Plastik Əməliyyat" adlı konsert proqramında baş verən səhnəyə münasibət bildirib.
Sumqayıtlı komediyaçı Teleqrafa.az-a açıqlamasında konsert proqramından əvvəl yaşanan hadisənin real olmadığını bildirib:
"Əlbəttə, həmin səhnə şou idi. Əksər tamaşaçılar bu səhnəyə inandılar. Hətta konsertdə öz qonaqlarımız da baş verənlərə inandılar və onu çox həyəcanla qarşıladılar. Bu səhnədən bizim yaradıcı komandanın üzvlərinin çoxu xəbərsiz idi, yalnız kiçik bir qisim məlumatlıydı. Səhnəni oynayanlar rəqqaslar idilər. Bu "oyun"dan sonra səhnədə rəqslərinə davam etdilər. Onlar peşəkar rəqqaslardır.
Hər dəfə konsertlərimizdə tamaşaçıları təəccübləndirməyə çalışırıq. Bu dəfə isə tamaşaçılarımızı həyəcanlandırdıq. Səhnə böyük səs-küyə səbəb oldu. İnsanlar hadisənin real olduğuna inandılar. Biz isə istədiyimizə nail olduq, yəni maraqlı, inandırıcı şou göstərdik".
