Sumqayıtda 18 yaşlı oğlan sevgilisini küçədə döyüb.
Məlumata görə, hadisə 9-cu mikrorayonda qeydə alınıb.
Belə ki, şəhər sakini, 2008-ci il təvəllüdlü Elsevər Aslanov (soyadı şərtidir – red.) özündən iki yaş böyük xanımla münasibətdə olub. Bir neçə gün əvvəl şəhərdə olarkən dostu Kənanın sevgilisi ona zəng edərək kömək istəyib.
O, valideynləri ilə mübahisə etdikdən sonra evi tərk etdiyini və gecələməyə yer istədiyini bildirib. Elsevər isə sevgilisinə zəng edərək onu şəhərdəki restoranlardan birinə dəvət edib. Orada xanımı sevgilisi ilə tanış edib və dostunun münasibətdə olduğu şəxs olduğunu söyləyib. Həmçinin onun gecələmək üçün yer axtardığını qeyd edib.
Elsevərin sevgilisi xanıma kömək edə bilməyəcəyini bildirib. Bundan sonra gənc oğlan dostunun sevgilisini şəhərdəki hotellərdən birində yerləşdirməyi qərara alıb və öz sevgilisini evə yola salmaq istəyib. Lakin xanım buna etiraz edib. Tərəflər arasında yaranan mübahisə zamanı 18 yaşlı oğlan sevgilisinə küçədə fiziki zor tətbiq edib.
Hadisə yerinə polis əməkdaşları gəliblər və Elsevər saxlanılıb.
Faktla bağlı başlanmış cinayət işi məhkəməyə göndərilib. Məhkəmə prosesində tərəflərin barışdığı elan olunduğundan cinayət işinə xitam verilib.
Mənbə: Oxu.az
