Bir neçə gün öncə Dövlət Ekoloji Təhlükəsizlik Xidmətinin son monitorinqləri ölkəmizdə, xüsusən də paytaxt və ətraf ərazilərdə ekoloji qanunsuzluqların hələ də davam etdiyini acı bir reallıq kimi ortaya qoyub.
Bakı, Sumqayıt və Abşeronda yaşıllıqlara ümumilikdə 72 min manata yaxın ziyan vurulması sadəcə quru statistika deyil, ətraf mühitə qarşı göstərilən etinasızlığın növbəti aqibətidir. Bəzi şirkət və qurumlar hələ də şəxsi maraqlar xatirinə təbiəti məhv edirlər. Kəsilmiş ağaca görə cərimə ödəmək, hüquqi prosedurdan keçmək mümkündür, lakin məhv edilən oksigen mənbəyini və on illərlə formalaşan canlı ekosistemi heç bir vəsaitlə geri qaytarmaq olmur.
Bu dəfə qanunsuzluqların ən qabarıq və bariz nümunəsi məhz Sumqayıt şəhərinin "payına düşüb". Araşdırma zamanı 4-cü məhəllə ərazisində ağac kəsiminin "Mahal" MTK tərəfindən həyata keçirildiyi məlum olub. Tikinti şirkəti ərazidəki dəyərli ağacları – ümumilikdə 8 ədəd sərv, Şərq çinarı və Eldar şamını məhv edib. Bu hadisənin təbiətə vurduğu ziyan ümumi zərərin tən yarısından çoxunu – 42 min manatı təşkil edir. Cinayət tərkibi yaradan bu əmələ hüquqi qiymət verilməsi üçün toplanan materiallar artıq Baş Prokurorluğa göndərilib.
Məsələnin ən təəssüfdoğurucu hissəsi isə "Mahal" MTK-nın bu əməli təkrarlamasıdır. Şirkətin yaşıllıqlara olan ögey münasibəti ilk dəfə deyil və belə faktların artıq ikinci dəfədir prokurorluq orqanlarına göndərilməsi həmin strukturun ekoloji qanunvericiliyi qəsdən və sistemli şəkildə heçə saydığını göstərir. Görünür, əvvəlki xəbərdarlıqlar və tədbirlər MTK üçün yetərli olmayıb.
Mənbə: Demokrat.аz
