Sumqayıtda fəaliyyət göstərən 30 nömrəli marşrut xəttində kondisionerlərin işləməməsi ilə bağlı şikayətlər artıb.
Sumqayit24.az-a müraciət edən sakin bildirib ki, şəhəri Hacı Zeynalabdin qəsəbəsi ilə əlaqələndirən avtobusların əksəriyyətində kondisionerlər işləmir. Onun sözlərinə görə, yay mövsümündə havanın yüksək temperaturu səbəbindən avtobusların salonunda dözülməz istilik yaranır və sərnişinlər ciddi narahatlıq yaşayırlar.
Şikayətçi məsələ ilə bağlı sürücüyə müraciət etsə də, aldığı cavab onu təəccübləndirib:
"Dedim ki, avtobusun içi yanır, kondisioneri niyə qoşmursunuz? Sürücü isə "Nə eləyim yanır? Cəhənnəmə yansın. Yanacaq yoxdur deyə qoşmuram" cavabını verdi."
Sakin iddia edir ki, belə hal təkcə bir avtobusda deyil, marşrut xəttində hərəkət edən bir çox nəqliyyat vasitəsində müşahidə olunur. O, xüsusilə yaşlıların, uşaqların və sağlamlıq problemi olan şəxslərin bu isti havada böyük çətinliklə üzləşdiyini bildirib.
Sərnişinlər aidiyyəti qurumlardan 30 nömrəli marşrut xəttində kondisionerlərin işlək vəziyyətə gətirilməsini və sərnişindaşıma zamanı rahatlığın təmin olunmasını tələb edirlər.
