"Sənaye və Yüksək Texnologiyalar üzrə Sumqayıt Dövlət Peşə Təhsil Mərkəzinin yenidən qurulması plana daxil edilsə də, artıq iki ildir ki, bu istiqamətdə işlərə başlanılmayıb".
Bunu Milli Məclisin iclasında 2027-ci ilin dövlət büdcəsi layihəsinin müzakirəsi zamanı deputat Mehriban Vəliyeva bildirib.
Deputat qeyd edib ki, Sumqayıtda peşə təhsilinin sənaye parkları ilə inteqrasiyası və müasir əmək bazarının tələblərinə uyğun kadr hazırlığı xüsusi əhəmiyyət daşıyır.
"Hesab edirəm ki, mərkəzin yenidən qurulmasının konkret icra qrafiki müəyyənləşdirilməli, eyni zamanda Prezidentin müvafiq sərəncamında tikintisi nəzərdə tutulan 21 peşə təhsili müəssisəsindən birinin Sumqayıtda yerləşdirilməsi məsələsinə baxılmalıdır", – deyə o vurğulayıb.
Mehriban Vəliyeva peşə təhsilinin keyfiyyətinin artırılması məqsədilə bir sıra qanunvericilik dəyişiklikləri də təklif edib. Onun sözlərinə görə, ictimai iaşə obyektlərində müvafiq ixtisaslar üzrə işə qəbul zamanı peşə təhsili sənədi və ya sertifikatın tələb olunması qanunvericiliklə tənzimlənməlidir.
Deputat həmçinin peşə təhsili məzunlarının təhsili başa vurduqdan sonra altı ay ərzində öz ixtisasları üzrə işlə təmin olunma göstəricilərinin hər il açıqlanmasını təklif edib. Bildirib ki, bu məlumatlar növbəti ilin dövlət sifarişi formalaşdırılarkən nəzərə alınmalıdır.
M.Vəliyeva sənaye parkları ilə əməkdaşlıq əsasında Azərbaycanda pilot peşə təhsili şəhərciyinin yaradılmasını da məqsədəuyğun hesab edib. Onun fikrincə, belə bir model çərçivəsində bir neçə təhsil müəssisəsi ortaq emalatxanalardan istifadə edə, işəgötürənlər tədris proqramlarının hazırlanmasında iştirak edə, tələbələr isə istehsalat təcrübəsini birbaşa müəssisələrdə keçə bilərlər.
Deputat diqqətə çatdırıb ki, 2027-ci ilin dövlət büdcəsində təhsil xərclərinə 5 milyard 99 milyon manat vəsait ayrılması nəzərdə tutulur. Bunun 2 milyard 185 milyon manatdan çoxu ümumi təhsilə, 435 milyon manatı məktəbəqədər təhsilə, 853 milyon manatdan çoxu ali təhsilə, 115,4 milyon manatı isə peşə təhsilinə yönəldiləcək.
O, təhsilə ayrılan vəsaitin səmərəliliyinin yalnız rəqəmlərlə deyil, təhsilin keyfiyyətində və əlçatanlığında əldə edilən real nəticələrlə ölçülməli olduğunu vurğulayıb.
Mehriban Vəliyeva Qarabağ və Şərqi Zəngəzurda təhsil infrastrukturunun inkişafına da toxunaraq Şuşa Dövlət Peşə Təhsil Mərkəzinin bölgədə tikinti, turizm və xidmət sahələri üzrə yerli mütəxəssislərin hazırlanmasında mühüm rol oynayacağını bildirib.
Deputat çıxışında təhsilin milli kimliyinə və dövlətinə bağlı, eyni zamanda müstəqil düşünən, rəqəmsal mühitdə məlumatları təhlil edə bilən, rəqabətədavamlı gənclər yetişdirməli olduğunu da diqqətə çatdırıb.
Mənbə: Modern.az
