Prezident İlham Əliyev Sərəncam imzalayıb. Sumqayıt24 bu haqda 31 avqust tarixində Bizim.media-ya istinadən xəbər verir.
Sərəncamla “Özəl investisiyaların cəlb edilməsi nəzərdə tutulan dövlət müəssisələrinin siyahısı” təsdiq edilib. Habelə Dövlət Neft Şirkətinin strukturuna (SOCAR) daxil olan 3 zavodun da özəlləşdirilməsi nəzərdə tutulub. Həmin zavodlardan “Azərikimya” İstehsalat Birliyi (Etilen-Polietilen zavodu) və Karbamid zavodu Sumqayıtda, Metanol zavodu isə Bakıda fəaliyyət göstərir.
Sərəncama əsasən, İqtisadiyyat Nazirliyi aidiyyəti üzrə Rəqəmsal İnkişaf və Nəqliyyat Nazirliyi və Azərbaycan İnvestisiya Holdinqi ilə razılaşdırmaqla, siyahıda nəzərdə tutulan dövlət müəssisələri tərəfindən maliyyələşdirilməklə nüfuzlu beynəlxalq məsləhətçi şirkətlərinin cəlb olunmasını təmin etməli, aparılacaq təhlillər əsasında müvafiq təkliflərini 9 ay müddətində dövlət başçısına təqdim etməlidir.
