Müharibə veteranlarının əməkhaqqından tutulan gəlir vergisi ilə bağlı mühüm məqam açıqlanıb.
Sumqayit24.az Dövlət Vergi Xidmətinə istinadən xəbər verir ki, müharibə veteranlarına əməkhaqqından gəlir vergisi üzrə güzəşt tətbiq olunur.
Belə ki, Vergi Məcəlləsinin 102.2.7-ci maddəsinə əsasən, qanunvericiliklə müəyyən edilmiş qaydada müharibə veteranı adı almış şəxslərin hər hansı muzdlu işdən vergi tutulmalı olan aylıq gəliri 400 manat məbləğində azaldılır.
Burada vacib məqam odur ki, qazilərin aylıq maaşının 400 manatı gəlir vergisindən azad edilir. Məsələn, veteran 1000 manat maaş alırsa, gəlir vergisi hesablanarkən 600 manatı nəzərə alınacaq.
Veteran statusu sonradan rəsmiləşdirilsə belə, güzəşt statusun qüvvəyə mindiyi tarixdən hesablanmalıdır. Məsələn, şəxsin veteran statusu 1 yanvar 2022-ci ildən qüvvədədirsə, lakin sənədi iş yerinə daha sonra təqdim edilibsə, güzəşt 2022-ci ildən tətbiq olunmalıdır.
Əgər həmin müddətdə şəxsin maaşından gəlir vergisi güzəştsiz tutulubsa, əvvəlki hesablamalara yenidən baxılması mümkündür. Bunun üçün veteranın işlədiyi müəssisənin mühasibatlığına müraciət etməsi lazımdır.
Dövlət Vergi Xidməti qeyd edib ki, bu güzəşt yalnız gəlir vergisinə aiddir. Yəni veteranların maaşından sosial sığorta, işsizlikdən sığorta və icbari tibbi sığorta haqlarının tutulmaması ilə bağlı ayrıca güzəşt nəzərdə tutulmayıb.
Qısası, veteranın maaşının 400 manatlıq hissəsi gəlir vergisindən azaddır. Əgər bu güzəşt əvvəlki illərdə tətbiq edilməyibsə, həmin məbləğin yenidən hesablanması üçün mühasibatlığa müraciət etmək mümkündür.
