"Uzun illərdir əmlak bazarında ciddi qiymət artımları baş verir. Evlərin sənədləşdirilməsi əmlak bazarına çox müsbət təsir göstərəcək".
Bunu Xeberle.com-a açıqlamasında əmlak məsələləri üzrə ekspert Elnur Fərzəliyev deyib. Onun sözlərinə görə, qiymət artımları ona görə baş verir ki, əmlakların böyük hissəsi müxtəlif növ kredit şərtləri ilə satılır:
"Alıcılar daha çox nağd pulla deyil, kreditli şərtlərlə əmlak alırlar. Bu zaman kreditli şərtlərlə satıla bilən əmlakların sayı azdır. Ucuz həyət evləri çıxarışlarla təmin olunarsa, bu, əmlak bazarına on minlərlə ucuz əmlakın daxil olması deməkdir. Bununla aztəminatlı insanların birmənalı olaraq ev problemləri həll olunacaq. Bu gün həyət evlərinin qiymətinə baxsaq, təxminən 25-30 min manatdan ortlama 100 min manata qədər fərdi yaşayış evləri satılır ki, həmin həyət evlərində çıxarışların olmaması səbəbindən bu əmlaklar normal qaydada alqı-satqı oluna bilmir, ipotek ilə satıla bilmir və s.
Amma bunlara çıxarışlar verilərsə, 40-50 min manat civarında evlərdir. Bunlar kreditlə satılanda ilkin ödənişi minimal, aylıq ödənişləri də az olacaq. Bu, insanları ev problemlərini aradan qaldırmaqla bərabər kirayələrdən də qurtarmış olacaq".
Qeyd edək ki, Azərbaycanda daşınmaz əmlak obyektləri üzərində hüquqların rəsmiləşdirilməsi ilə bağlı Prezident İlham Əliyevin imzaladığı fərman 100 minə yaxın vətəndaşa sənədsiz evlərini qeydiyyatdan keçirmək imkanı yaradacaq.
