Sumqayıtda “Gender bərabərliyinə etibarlı hüquqi zəmin” adlı dəyirmi masa keçirilib. Sumqayıt24 bu haqda 8 dekabr tarixində xəbər verir.
Tədbir Heydər Əliyev Mərkəzi və Şəhər Mədəniyyət Evi tərəfindən təşkil olunub. Aparıcı şairə Lilpar Cümşüdqızı gender bərabərliyindən danışıb. Vəkillər Kollegiyasının üzvü Günel Səfərli öz çıxışında ölkəmizdə gender bərabərliyinin təmin edilməsinin daim dövlət siyasətinin prioritet istiqamətlərindən biri olduğunu bildirib.
Dəyirmi masada Heydər Əliyev Mərkəzinin direktoru Vüsalə Qurbanova, Şəhər Mədəniyyət Evinin direktoru Elnarə Rəşidova, bədii rəhbər Kəmalə Aslanova Azərbaycan cəmiyyətində, ümumilikdə Azərbaycan Ordusunda gender bərabərliyinin və milli-mənəvi dəyərlərimizin təbliği işlərindən geniş, məzmunlu çıxışlar ediblər.
“Veteranlar” xalq xorunun konsertmeysteri Turanə Vəliyeva, Heydər Əliyev Mərkəzinin fond müdiri Fatima Tanrıverdiyeva Xidmət Sahələri üzrə Sumqayıt Dövlət Peşə Təhsil Mərkəzinin şagirdləri ilə mövzuya uyğun yarış keçiriblər.
Sonda şagirdləri maraqlandıran suallar cavablandırılıb, videoçarx izlənilib.
