"İranda son günlərdə müşahidə olunan hava çirkliliyi həm təbii (toz fırtınaları), həm də texnogen (sənaye və hərbi gərginlik fonunda yaranan tüstü) amillərlə bağlıdır.
İranda müşahidə olunan hava çirkliliyi və toz hadisələrinin Azərbaycana keçməsi elmi baxımdan mümkündür, lakin bu hər dəfə baş vermir və əsasən küləklərin istiqaməti və meteoroloji şəraitdən asılıdır".
Bu fikirləri hava və iqlim məsələləri üzrə ekspert Cavid Hüseynov Konkret.az-a açıqlamasında bildirib.
C.Hüseynov qeyd edir ki, martın 7-8-də İranda (Tehran və digər şəhərlər) baş verən partlayışlar və neft anbarlarındakı yanğınlar nəticəsində atmosferə çox miqdarda toksik maddə (kükürd və azot oksidləri) atılıb:
"Bu cür toz və tüstü kütlələrinin ölkəmizə çatması üçün çox güclü cənub küləklərinin əsməsi tələb olunur ki, hazırkı proqnozlar bunu göstərmir. Hazırda Azərbaycan ərazisində əsasən qərb və şimal-qərb küləkləri üstünlük təşkil edir
Bu o deməkdir ki, İranda (xüsusilə cənub və mərkəzi hissələrdə) yaranan tozlu hava kütlələri adətən cənub-şərq istiqamətinə, yəni bizdən uzağa doğru hərəkət edir".
Ekspertin sözlərinə görə, Azərbaycanın rəsmi qurumları mütəmadi olaraq havanın keyfiyyətini monitorinq edir. Bu günə olan məlumata görə Bakı və Abşeron yarımadasında, eləcə də digər bölgələrdə hava keyfiyyəti norma daxilindədir.
"Sərhədyanı bölgələrdə (xüsusilə Naxçıvanda) hərbi gərginliklə bağlı lokal tozlanma olsa da, bu, ümumi ekoloji fəlakət səviyyəsində deyil".
