Tanınmış meyxanaçı Balabəy Sumqayıt çimərliyində xilasedici kimi çalışıb.
Titul.az-ın məlumatına görə, bu barədə o özü məlumat verib. Balabəy bir gün Xəzərin sahilində işdə olarkən başına gələn ilginc hadisədən danışıb. O, bildirib ki, hadisə baş verən gün hava çox küləkli olub. Ona ratsiya vasitəsilə məlumat verilib ki, heç kimi dənizə buraxmasın, təhlükəlidir. Balabəy qeyd edib ki, bir qədər sonra üç uşağın Xəzərin sahili ilə ona tərəf gəldiyini görüb:
“Azyaşlı idilər. Dedilər ki, “əmi, burada çimək də, 10 dəqiqə çimək, gedək”. Hiss olunurdu ki, onlar evdən icazəsiz gəliblər.
Dedim yaxşı, burada çimin, amma uzağa getməyin. Mən də sahildə, onlara yaxın dayanmışdım. Gördüm ki, dalğa uşaqları çəkib aparır. And ola Allaha, mən gözün danışmağını o gün gördüm. Gözləri ilə deyirdi ki, məni xilas et”.
Meyxanaçı üç azyaşlını güclü dalğanın əlindən xilas etməyin çətin olduğunu anlasa da, üzərindəki iplə ikisini boğulmaqdan qurtarmağı bacarıb. Balabəy digər uşağın isə həmin vaxt sahildə olan bir başqa şəxs tərəfindən xilas edildiyini deyib.
