Sumqayıt sakini özünüməşğulluq proqramına qoşulduğu üçün peşman olub. Bu barədə o, ApaTV-yə danışıb.
Yaşıldərə yaşayış massivində yaşayan Əhliman Əliyev bir müddət əvvəl Dövlət Məşğulluq Agentliyinin müvafiq layihəsinə qatılıb və təlimlərdə iştirak edib. Nəhayət, iyul ayında ona bir il satmamaq şərti ilə üç baş inək verilib. Lakin çox keçmədən onun ümidləri puç olub.
O, iddia edir ki, ona verilən heyvanlar qısırdır və süd vermirlər. Hətta onlardan biri xəstə olduğu üçün müalicəyə əlavə xərc də çəkməli olub. Bundan əlavə, müqavilədə nəzərdə tutulan təminatdan ona yalnız 400 kq yem verilib, 65 bağlama samanın taleyi isə bəlli deyil.
Dövlət Məşğulluq Agentliyinin mətbuat katibi Əsmər Nəcməddinqızı açıqlamasında bildirib ki, verilən əmlakda qüsur aşkar olunarsa, bu haqda məlumat və təsdiqedici sənədlər əmlakın təhvilindən ən geci 30 gün ərzində məşğulluq filialına təqdim edilməlidir. Əhliman Əliyev isə müraciətini gecikdirib və heç bir sənəd təqdim etməyib.
Sonda qeyd olunub ki, bu günlərdə vətəndaşa qalan ot kipləri də veriləcək.
