Sumqayıt və ətrafında yaşayan şəhid ailələri və müharibə iştirakçıları üçün ödənişsiz tibbi-sosial aksiya keçirilib. Bu haqda 8 noyabr tarixində Sumqayıt24 xəbər verir.
Aksiya ulu öndər Heydər Əliyevin 100 illik yubileyi və 8 Noyabr – Zəfər Günü münasibətilə “Referans Medical Group” və Sosial Xidmətlər Agentliyi tərəfindən “Referans Sumqayıt” Tibb Mərkəzində təşkil olunub.
10-dan çox yüksəkixtisaslı həkim və tibb personalı sözügedən kateqoriyaya aid şəxslərə tibbi xidmət göstərib, terapevt, nevroloq, kardioloq, hepatoloq, ginekoloq, radioloqlar tərəfindən müayinələr aparılıb.
Ümumilikdə gün ərzində 100-dən çox tibbi xidmət göstərilib. Həmçinin həkim təyinatlarına əsasən, onlar diaqnostik xidmətlərdən də ödənişsiz keçiblər. Müayinələrin nəticəsinə əsasən, müvafiq müalicələr yazılıb.
