Bu gün Vətən müharibəsi şəhidi Elmar Nəsibovun doğum günüdür.
Elmar Şirzad oğlu Nəsibov 1987-ci il sentyabrın 19-da Sumqayıt şəhərində anadan olub. 2005-ci ildə orta məktəbi bitirən Nəsibovun uşaq vaxtlarından hərbi sənətə böyük marağı olub. Doqquz illik Silahlı Qüvvələrdə xidməti dövründə Şəmkir, Qazax, Gədəbəy, Daşkəsən və Beyləqanda işləyib. Xidməti dövründə bir sıra təltiflərə layiq görülüb.
"Şahin gözlü” ləqəbi ilə tanınan peşəkar kəşfiyyatçı-snayper olan Elmar Nəsibov 2020-ci il sentyabrın 27-də başlanan Vətən müharibəsi zamanı Cəbrayıl və Füzuli rayonları istiqamətində gedən döyüşlərdə savaşıb. Elmar oktyabrın 12-də Füzuli döyüşləri zamanı şəhid olub. Sumqayıt Şəhidlər Xiyabanında dəfn olunub.
Şəxsi igidliyi və şücaəti nümayiş etdirdiyinə görə, ölümündən sonra "Vətən uğrunda", "Füzulinin azad olunmasına görə" və "Döyüşdə fərqlənməyə görə" medalları ilə təltif edilib.
