Bu gün Saray qəsəbəsindən olan şəhidimizin doğum günüdür.
Vidadi Zalov 17 iyul 1985-ci ildə Saray qəsəbəsində anadan olub. 1992-2003-cü illərdə Saray qəsəbəsi 2 saylı orta məktəbdə təhsil alıb. Daha sonra Azərbaycan Dövlət İqtisad Universitetinə qəbul olub. Ailəli idi, bir oğlu və qızı yadigar qalıb.
Azərbaycan Ordusunun kiçik çavuşu olan Vidadi Zalov 2020-ci il sentyabrın 27-dən başlanan Vətən müharibəsində iştirak edib. Laçının azadlığı uğrunda gedən döyüşlərdə vuruşaraq fərqlənib.
2023-cü ildə Ermənistan Silahlı Qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətində yerləşən üzbəüz mövqelərini atıcı silahlardan intensiv atəşə tutub. Qarşı tərəfin törətdiyi təxribat nəticəsində Azərbaycan Ordusunun hərbi qulluqçuları şəhid olub və yaralanıb. Baş verən qarşıdurma nəticəsində Vidadi Zalov döyüş tapşırığının yerinə yetirilməsi zamanı şəhid olub.
2023-cü il 12 aprel doğulduğu Saray qəsəbəsində dəfn olunub.
