Səs verək - Azərbaycanı sanksiyalardan qoruyaq!

Fransa Senatı vətənimizə qarşı sanksiyalar tətbiq etmək istəyir. Bu səbəbdən biri Sumqayıt sakini olmaqla ümumilikdə 10 vətəndaş Fransanın Mesopinions.com petisiya saytında ölkənin Senatına və xalqına müraciət yerləşdirib.

Petisiyada qeyd edilir: “Azərbaycan hakimiyyətinin rəsmi mövqeyini təqdim etməyən sadə vətəndaşlar daha öncə heç bir zaman kollektiv şəkildə Fransanın parlament orqanlarına və xalqına müraciət etməyiblər. Bunu etməyə bizi 3 oktyabr 2022-ci il tarixində Senatın altı üzvü tərəfindən irəli sürülən qətnamə layihəsi sövq etdi, həmin qətnamənin nəzərdən keçirilməsi 15 noyabr tarixinə təyin edilib”.

Fransa Senatının qətnamə layihəsinin müəllifləri aşağıdakı ittihamları və tələbləri irəli sürüblər:

• Azərbaycan “çoxsaylı təcavüzkar hərəkətlərdə” ittiham edilir;


• Azərbaycandan Laçın dəhlizindən çıxmaq tələb edilir;


• Azərbaycan “irqçilikdə” ittiham edilir;


• Azərbaycan ermənilərin Qarabağa geri qayıtmaq “haqqının” təmin edilməsinə çağırılır;


• Azərbaycan Qarabağdakı “erməni mədəni və dini irsinin” qorunub-saxlanılmasına çağırılır;


• Fransa hakimiyyəti Beynəlxalq Cinayət Məhkəməsində “kütləvi cinayətlər və hərbi cinayətlər” törədilməsinə dair ölkəmizi ittiham edir və istintaqın başladılmasına çağırış edir;


• Fransa hakimiyyəti “Azərbaycandan idxal edilən qaz və neftin embarqo edilməsinin” Avropa İttifaqı miqyasında başladılmasına çağırış edir;


• Fransa hakimiyyəti Qarabağdakı Azərbaycan ərazilərində özünün “humanitar bürosunu” yaratmağa çağırılır;


• Fransa hakimiyyəti Ermənistanın hərbi potensialının möhkəmlənməsinə çağırılır.

Bunun qarşısını almaq istəyən bir qrup azərbaycanlı Fransa Senatına və xalqına ittihamlar və tələblər səsləndirib. Tam mətn Azərbaycan və rus dilində tərcümə edilib (linklərə keçid edərək tanış ola bilərsiniz).

Dünya azərbaycanlıları, birlik vaxtıdır! 30 illik işğalı, şəhidlərimizi, yetim qalmış və həlak olmuş uşaqları unutmayan hər kəsə səslənirik! Həmin ittihamlara qarşı yönəldilmiş bu petisiyaya dəstək olaq! Vətənimiz Azərbaycan naminə!

Fransız dilini bilmədən petisiyaya dəstək olmaq istəyənlər üçün addım-addım təlimatlar (rus dilində) hazırlanıb.

Bu postun linkini qohumlarınız, dostlarınız və tanışlarınız arasında yayın. Biz birlikdə güclüyük! Həmrəy olaq, səsimizlə Azərbaycanı qoruyaq!

Petisiyanın daha çox yayılması üçün bu heşteqlərdən istifadə edək:

#BizAzərbaycanıq #AzərbaycanıQoruyaq