Sumqayıt Dövlət Universiteti (SDU) nümayəndə heyəti Macarıstanın paytaxtı Budapeştdə keçirilən "QS Higher Ed Summit: Europe 2026" beynəlxalq sammitində təmsil olunur.
Sumqayit24.az-a bu barədə universitetin mətbuat xidmətindən bildirilib.
Qeyd olunub ki, sammit çərçivəsində Azərbaycan pavilyonunda ölkəmizi təmsil edən 9 ali təhsil müəssisəsindən biri də Sumqayıt Dövlət Universitetidir.
Dünyanın müxtəlif ölkələrindən ali təhsil liderlərini, ekspertləri və sənaye nümayəndələrini bir araya gətirən tədbirdə SDU beynəlxalq əməkdaşlığın genişləndirilməsi, universitetin qlobal tanıtımı və yeni tərəfdaşlıqların qurulması istiqamətində iştirak edir.
Universitet tədbirdə öz stendi ilə iştirak edir. Stenddə SDU-nun tədris və elmi fəaliyyəti, beynəlxalq layihələri, innovativ təşəbbüsləri, təhsil imkanları və əməkdaşlıq potensialı barədə iştirakçılara ətraflı məlumat təqdim olunur. Tədbir müddətində universitet nümayəndələri panel müzakirələrində və işgüzar görüşlərdə iştirak edərək yeni akademik əlaqələrin qurulması, birgə tədqiqat layihələrinin həyata keçirilməsi və tələbə-müəllim mübadiləsi imkanları ətrafında fikir mübadiləsi aparırlar.
QS sammitində iştirak SDU-nun beynəlxalqlaşma strategiyasının inkişafı, qlobal ali təhsil məkanında mövqeyinin möhkəmləndirilməsi və universitetin beynəlxalq səviyyədə tanıdılması baxımından mühüm əhəmiyyət daşıyır.
