Sumqayıt Dövlət Universitetində (SDU) “Kibertəhlükəsizlik” mövzusunda infosessiya keçirilib. Sumqayıt24 bu haqda 24 noyabr tarixində xəbər verir.
Təhsil ocağının Karyera və Məzunlarla İş Mərkəzinin müdiri Nəsibə Əmirbəyova müasir dövrdə artan kibertəhlükələrdən və onlardan qorunmağın vacib nüanslarından danışıb. Bildirilib ki, təlimin məqsədi universitetin tələbələrini kibertəhlükəsizliyin texnoloji aspektlərini nəzəri və praktiki cəhətdən məlumatlandırmaqdır.
Nəsibə Əmirbəyovanın sözlərinə görə, yaxın zamanlarda Azərbaycan Kibertəhlükəsizlik Təşkilatları Assosiasiyasının nümayəndələri SDU-da olublar, burada “Kiberklub”un yaradıldığı və AKTA tərəfindən hər cür dəstəyin göstərildiyi qeyd edilib. Bu gün də klubun ilk təlimidir. Məlumata əsasən, “Kiberklub”un tədbir, müsabiqə və təlimlərini Tarix və coğrafiya fakültəsinin I kurs tələbəsi Səidə Əhmədova təşkil edir.
Sonra MilliSec platformasının təsisçisi və rəhbəri Zaur Qasımov kibertəhlükəsizlik və onun strateji əhəmiyyətindən, bu sahədə tədqiqatların və yüksəkixtisaslı kadr hazırlığının aktual vəzifələrindən söz açıb.
Zaur Qasımov kibertəhlükəsizliyin təməlləri, tətbiqi hücum-müdafiə bacarıqlarının təkmilləşdirilməsi və bu sahədə gələcək karyera inkişafı ilə bağlı gənclərə önəmli məlumatlar verib.
Əmanətlərin sığortalanması Fondunun (ADIF) İnformasiya Təhlükəsizliyi mütəxəssisi Süleyman Əliyev “Artmaqda olan kibertəhdidlər fonunda milli iqtisadi təhlükəsizlik: kiberhücumların milli iqtisadiyyatlara təsiri, doğurduğu nəticələr və onların həlləri” mövzusunda çıxış edib. Kibertəhlükəsizliyin, kibertəhdidlərin qarşısının alınması yolları, kibertəhlükəsizlik istiqamətində startap layihələrin inkişafından danışılıb.
Sonda müzakirələr aparılıb və suallar cavablandırılıb.
