Sumqayıtdakı ali məktəbə qəbul olunan tələbələr üçün yaşayış yeri və şəraiti, qiymətlər ən aktual məsələlərdən biridir.
Sumqayıt24.az bununla bağlı Sumqayıt Dövlət Universitetinin (SDU) Tələbə Evində yaradılan şərait, qiymətlər və güzəştlərlə bağlı məlumat əldə edib.
SDU-dan bildirilib ki, 2026–2027-ci tədris ili üçün yeni Tələbə Evi tam hazır vəziyyətə gətirilib. Burada ümumilikdə 248 tələbə üçün yaşayış yeri var. Otaqlar 3 və 4 nəfərlikdir, tam təmir olunub və müasir tələblərə cavab verir. Bundan əlavə, qonaq tələbələr üçün də 17 çarpayılıq yer nəzərdə tutulub.
Aylıq yaşayış haqqı 70 manatdır və bu məbləğə kommunal xərclər daxildir. Yerləşmə zamanı depozit tələb olunmur. 500 və daha yüksək balla qəbul olunan tələbələr isə Tələbə Evində ödənişsiz qala biləcəklər. Bu ildən etibarən şəhid övladları üçün də yaşayış ödənişsiz olacaq.
Tələbə Evində qalmaq istəyən I kurs tələbələri şəxsiyyət vəsiqəsi, digər kursların tələbələri isə tələbə bileti ilə SDU-ya müraciət edə bilərlər. Universitet müraciətlərə müəyyən edilmiş qaydada baxaraq yerləşmə prosesi barədə tələbələrə məlumat verəcək.
