Müasir dövrdə sosial şəbəkələr və rəqəmsal texnologiyalar böyüklər kimi uşaqların da həyatının ayrılmaz hissəsinə çevrilib.
Telefon, planşet və televizor kimi ekran vasitələri artıq erkən yaşlardan uşaqların diqqətini cəlb edir.
Bununla bağlı Milli Məclisdə sosial şəbəkələrdən istifadə yaşının 16-ya qaldırılması təklif olunur. Layihəyə görə, 16 yaşdan kiçiklər bəzi platformalarda hesab aça bilməyəcək. Qaydalara əməl etməyən internet provayderləri və platformaları isə cərimələnəcək. Bu təklif isə cəmiyyətdə müxtəlif fikirlərə səbəb olub.
Bəs Azərbaycanda sosial şəbəkələrə qoşulma yaşının 16-ya qaldırılması yeniyetmələrin sosiallaşmasına necə təsir edə bilər?
Məsələ ilə bağlı Sumqayit24.az-a açıqlama verən sosioloq Mail Yaqub bildirib ki, uşaqlar və yeniyetmələr sosial şəbəkədə zəhərlənirlər:
"Sosiallaşma təkcə sosial şəbəkə ilə deyil. Sosiallaşmanın müxtəlif vasitələri var. Məsələn, valideynlə, dostlarla ünsiyyət qurmaq - hamısı sosiallaşmaq deməkdir. Hətta valideyn nəzarəti ilə internetdən, "Youtube" platformasından düzgün istifadə etmək də olar. Oturub sosial şəbəkədə hansısa əxlaqsızın videosuna baxmaq sosiallaşmaq demək deyil.
Bu təklifi dəstəkləyirəm. Uşaq və yeniyetmə yaşında olanlar sosial şəbəkədən zəhərlənirlər. Təəssüflər olsun ki, Azərbaycanda sosial şəbəkə seqmentində elə insanabənzər məxluqlar peyda olub ki, onlar birbaşa yeniyetmələrin psixologiyasına təsir edir. Ona görə bu qanun qəbul olunaraq düzgün tətbiq edilsə, uşaqlarımızın və yeniyetmələrimizin psixoloji sağlamlığına böyük töhfə verəcək".
Əsmər Sənani
